لرواد الأعمال: كيف توازن بين العمل وحياتك الشخصية

مع رتم الحياة السريعة والسباق المستمر والمتواصل لمواكبة التطور وانشغالنا بتطوير مهاراتنا وشغلنا أحياناً حياتنا الشخصية بتتأثر أو بتختفي في زحمة الحياة العملية ومش بندرك ده غير في وقت متأخر، قد نكون بعدنا عن أصدقاءنا أو أهلنا وأطفالنا وخسرنا دورنا في حياتهم . من ضمن الناس اللي حياتها العملية ممكن تبتلع حياتها الشخصية هي فئة رواد الأعمال ، خصوصاً الطموحين اللي عندهم هوس وشغف بعملهم وبيعتبروا مشروعهم هو الثمرة اللي لازم يعتنوا بيها بشكل جيد جداً فبتكون النتيجة ان دايرة حياتهم الشخصية بتصغر حتى انها بتقرب من الاختفاء ، الا لو هما عندهم من الذكاء القدر الكافي للموازنة بين الطرفين.

اذا كنت واحد من رواد الأعمال وعندك مشكلة في ان الشغل بيبتلع يومك كاملاً ومش بتقدر تقوم بأي أنشطة من أي نوع أو تنام بالقدر الكافي وبتهمل ممارسة الرياضة أو انك تنعم بوجبات صحية فمن المؤكد انك بتواجه مشكلة بتكبر معاك كل يوم ممكن تكون مش مُدرك تأثيرها ، لكنها موجودة وبتسبب أزمات في حياتك.

خلق التوازن بين العمل والحياة الشخصية مش مستحيل ، هنا ماتصدقش اللي يقولك ان صاحب بالين كداب لأنك ببساطة ممكن تحقق التوازن ده بدون ما تهمل شغلك وحلمك وفي النفس الوقت قادر تهتم بنفسك وصحتك وحياتك والناس اللي فيها. لكن ازاي تحقق ده؟!، بشوية خطوات بسيطة سهل تتعود عليها بمرور الوقت :

حدد أولوياتك

الخطوة دي محتاجة منك وضوح قدام نفسك، ايه الأهم في حياتك ؛ الشغل ولا الحياة الشخصية؟!، اذا كان الشغل فايه الضريبة اللي محتاج تدفعها عشان تتفرغ ليه بشكل كامل ؟ هل هي علاقتك بأصدقاءك وأهلك ؟ هل هو وقتك اللي بتقضية في ممارسة هواياتك أو الاهتمام بصحتك ؟!، أما اذا كان الأهم هو حياتك الشخصية فمحتاج برضه تقرر أو تحدد هتقدر ازاي تحمي نفسك من ان الشغل يسرقك منها أو يلغيها.

حط أهدافك بذكاء

وفقاً لاحدى الدراسات فيه نسبة تمثل 63% من رواد الأعمال بيتعدوا ساعات العمل الأساسية وأغلبهم بيعمل كده بدافع الضرورة ، يعني انه لازم يعمل كده عشان يخلص شغل مهم . السبب البديهي اللي ممكن تخمنه بنفسك هو سوء التخطيط وادارة الوقت وان أهدافك مش واضحة ومش ذكية بالقدر اللي يحفظ لك وقتك أو انك مش بتطبق مبدأ work smarter not harder.

اهدافك لابد تكون متوافقة مع اولوياتك, بعد تحديد اولوياتك زي ماقلنا فى النقطة السابقة لازم يكون عندك خطة عمل تساعدك على تحقيق اهدافك, علشان تعرف اكتر:

كيف تكتب خطة عمل شاملة

حول نمط حياتك وخليه صحي أكتر

الحياة الصحية مهمة جداً واهمالها ليه عائد سلبي على كل مفردات وأمور حياتك الأخرى ، الرياضة والتغذية الصحية بتدعمك حتى في الأوقات اللي بتعاني فيها من الضغط في شغلك أو حياتك عموماً وعلى النقيض اهمالها بيأثر عليك ومع اجهادك المستمر واستنزافك في الشغل مش بتلاقي دعم أو طاقة انك تواصل طالما أهملت صحتك.

قدِّس اجازتك الأسبوعية

أحسِن استثمارها لأنها هي اللي هتزود طاقتك طول الأسبوع وهتصفي ذهنك للشغل . مهم انك ذي ما بتخطط لشغلك تخطط لاجازتك وتحدد الأنشطة اللي هتقوم بيها انت وعائلتك وازاي هتستفيد من الوقت معاهم سواء بالأنشطة أو الرحلات أو غيرها.

أخيراً؛ الحياة مش شغل وبس ، الحياة الشخصية بما فيها علاقتك بأهلك وأصدقاءك ونمطك الصحي وأنشطتك وهواياتك وغيرها ركن مهم جداً بيدعم بشكل أو بآخر نجاحك في شغلك أو هو المسئول الأساسي عنه فمينفعش تهمله أو تقصر فيه.

 

المصدر:

لأصحاب الاعمال: كيف توازن بين العمل وحياتك الشخصية

احصل على كوبون اعلاني لجووجل ادورد بقيمة تصل حتى 100$

>

هل تريد الوصول لعملاء أكثر من خلال موقعك الإلكتروني؟