10 حاجات ماتعملهاش لو بتبدأ Startup 2

10 حاجات ماتعملهاش لو بتبدأ Startup

إنك تبدأ بيزنس خاص بيك خطوة صعبة وفيها كبير .. تحدي إنك تقوّم كيان من البداية للنهاية وتحدي الدخول فى عالم البيزنس اللى معظمنا معندوش خبرة فيه ومشاكله المعقدة زى إدارة الماليات والموظفين وغيرها اللي بيأدى إن شركات كتير تبدأ وتقع في نص الطريق وماتكملش, علشان كده جمعنالكم أشهر 10 أخطاء بتحصل في معظم الـ startups علينا إننا نتجنبها :

Contents

1-الفردية

مفيش مؤسسة بتقوم على أفكار وقرارات مؤسس واحد.. يفضل إن يكون ليك شريك فى الـ startup وإنه يكون مختلف عنك فى طريقة التفكير واتخاذ القرارات لتحقيق التوازن ومهم كمان إنك تاخد رأي فريق العمل وأصدقائك والناس الموثوق فيها في أي موقف صعب بتمر بيه.

2-العمل بدون خطة

في حالة عدم وجود business plan أو وجودها وعدم الالتزام بيها توقع وقوع البيزنس في أي لحظة لأن بدون خطة مش هتلاقي حاجة توجهك دايما للطريق اللى انت رسمته من البداية والخطة لازم تكون بتجاوب على أسئلة زي: هدف البيزنس ؟ العملاء المستهدفين ؟ القيمة اللي بيقدمها البيزنس (value) ؟ مهمة البيزنس (mission) ؟ التوجه المرغوب فيه من البيزنس ؟ المنافسين ؟ معايير قياس النجاح ؟ وغيرها من العوامل اللي بتخطط لكل تفاصيل البيزنس ومتسقبله وبالتالي أي عثرات هتحصل في النص هتكون عارف كويس تتعامل معاها إزاي.

3-سوء استغلال الموارد المالية :

وجود أموال شركة تحت تصرفك مش أمر هيّن، خصوصا لو التعامل في الأمور المالية بيكون عن طريقك.. ماتكوّنش فريق كامل من البداية عشان ماتتحملش عناء دفع مبالغ كبيرة على الرواتب أنت في غنى عنها في البداية والحل إنك تعين العدد اللى محتاجه يكون معاك بشكل دايم بس و تـ outsource الخدمات اللى بتحتاجلها من وقت للتاني من أشخاص خارج الشركة أو شركات تانية.

4-انتظار وصول العملاء:

من أشهر الأخطاء الذى يقع فيها اصحاب الأعمال الجديدة, نظراً للإعتقاد السائد ان المنتج الجيد لا يحتاج ترويج, التسويق من أعمدة الأعمال يمكنك تنفيذ إستراتيجيات التسويق الإلكتروني للشركات الناشئة التى ننصح بها متابعين مدونتنا لتجنب الوقوع فى فخ انتظار العملاء بدون محاولة الوصول إليهم.

4-التجمد وعدم المرونة :

طبيعي جدا في أي startup إن يحصل متغيرات أو إن الخطط الموضوعة من البداية ماتتنفذش بحذافيرها وهنا لازم يكون القدرة على المرونة والتشكل حسب الظروف و استغلالها لصالحك وبلاش الثبات على رأي واحد طول الوقت.. شركة نوكيا في البداية كانت عبارة عن مصنع ورق وأحذية مطاطية قبل الدخول في عالم الالكترونيات ;)

5-التركيز في كل التفاصيل :

محاولة التميز والتفكير بره الصندوق زيادة عن اللازم مش دايما بيكون صح.. أحيانا بيكون التركيز جوه الصندوق هو المطلوب لتحقيق أفضل نتائج، بعضنا بيلجأ للتفكير في فكرة جديدة وبعيدة ماحدش عملها قبل كده ومالهاش سوق بهدف إنه مايكونش ليه منافسين.. لكن أحيانا النتيجة بتكون عكسية.

6-اختيار موقع غير مناسب

وجود شركتك في موقع مناسب و قريب من العملاء المستهدفين مفتاح مهم لوصولهم ليك بسهولة وتحقيق هدفك.

7-البداية في توقيت غير مناسب

اختيار التوقيت المناسب للـ Launching ومراعاة الظروف الطبيعية والإقتصادية للبلد والخارجة عن سيطرتك شيء مهم.. و عليك إنك ماتتسرعش في البداية قبل وضع كل النقط على الحروف في كل الأمور والتفاصيل الخاصة بالبيزنس وكمان إنك ماتتأخرش زيادة عن اللزوم فالفرصة تضيع.

8-تعيين الموظف الغير مناسب

أحيانا تعيين موظف غير مؤهل بالدرجة الكافية أو الاستعانة بالأصدقاء والأقارب أو تعيين شخص غير قادر على التعامل بروح فريق العمل بيدمر الشركات الصغيرة.. كمان اتأكد من توثيق كل شيء والاعتماد على التقارير مش الأشخاص لأن مفيش شخص دايم.

9-التوسع بشكل سريع جدا

(إحصائية) 74% من الـ online startups وقعت بسبب التوسع بسرعة مبالغ فيها وتخطي المراحل الطبيعية اللي ممكن تمر بيها أي startup فأحيانا النجاح الأولي ووجود أرباح مُرضية في البداية بيؤدي للغرور ولإنك تشوف البيزنس في مكانة أعلى من مكانته وتبدأ تصرف مصاريف مش في مكانها إعتمادا على دوام الربح ده وهو شيء مش مضمون حدوثه.

10-عدم الاهتمام بالـ feedback

سواء كانت إيجابية أو سلبية عليك إنك تهتم بتجميع الآراء حوالين شغلك أول بأول و الاستفادة منها مع الأخذ في الاعتبار إن بالتأكيد مش كل الآراء أو النصايح هتكون لمصلحتك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *