انواع اللوجوهات بالصور

اللوجوهات بشكل عام ليها أكتر من نوع .. و كل نوع ليه إستخدامه و سلبيياته و إيجابيياته، تعالوا نعرف إيه اﻷنواع المختلفة للوجو في المقال مع مثال لكل نوع عشان الصورة توضح أكتر

1-iconic/symbolic

لوجوهات أيقونية و دي بتتميز بإنها مميزة (أيوة بتتميز و مميزة ورا بعض على طول عادي) بس مش معقدة في التصميم.

ماشي ورا (خير الكلام ما قل و دل)

بيعتمد على الخيال شوية لمعرفة ماهية الشركة أو الجهة صاحبة اللوجو من غير وجود أي كلام مكتوب يعبّر.

يشترط فيها توافر كذا حاجة عشان تؤدي غرضها:

أ- التمييز .. يعني أول ما يتشاف يتعرف أيوة دا بتاع كذا
ب- التمييز .. بيفضل في دماغك مش بتنساه بمجرد ما شوفته و لو حتى مرة واحدة
ج-الوضوح .. بما إن فهم اللوجو يعتمد على شئ مرسوم مش كلام ف لازم يبقى واضح سواء كان كبير ولا صغير, من قريب أو من بعيد.
د- معبّر .. معتمد إعتماد كلي على الوصف التجريدي لمجال الجهة أو الشركة بصورة مبسطة. إنت لازم تشرحله دا إيه بس من غير ما تطلع من نطاق تصميم اللوجوهات و تخش في جرافيك ديزاين لشكل.

2-logotype/work mark

بيقى اللوجو عبارة عن إسم الشركة مثلا و مكتوبة بس بأسلوب جميل. غالبا بيبقى الخط مرسوم مش فونت عادي مثلا و إلا مش هايبقى مميّز و ممكن يتكرر كتير.
(ما هو أكيد مش شغلتك تنزل فونت تكتب بيه و كدا بقيت ديزاينر)

النوع دا غالبا بيبقى للشركات الكبيرة .. أو ممكن ناوية تبقى كبيرة عادي برضه. شركة كل إحتياجها إن الإسم يتعرف و شغلهم بيعرّف نفسه بنفسه مش محتاج تسويق أو شرح أو حتى أيقونة.
(ساعات نايكي مثلا  بتستخدم الكلمة من غير الأيقونة عشان خلاص بقت حاجة معروفة و غنى عن التعريف)

طبعا رسم الكلام ممكن يبقى متشابك بشكل ما بس لازم يبقى واضح و مقروء برضه سواء كان كبير ولا صغير.

3-combined marks

دا بيبقى الإتنين مع بعض .. و بيكمّلوا بعض دي بتوضّح دي و العكس. في لوجوهات بيبقوا الإتنين ملازمين لبعض ماينفعش ينفصلوا و في ساعات بينفصل عادي بس نادرا ما بتحصل.